آہٹ سی کوئی آئے تو لگتا ہے کہ تم ہو
سایہ کوئی لہرائے تو لگتا ہے کہ تم ہو
جب شاخ کوئی ہاتھ لگاتے ہی چمن میں
شرمائے لچک جائے تو لگتا ہے کہ تم ہو
صندل سے مہکتی ہوئی پر کیف ہوا کا
جھونکا کوئی ٹکرائے تو لگتا ہے کہ تم ہو
اوڑھے ہوئے تاروں کی چمکتی ہوئی چادر
ندی کوئی بل کھائے تو لگتا ہے کہ تم ہو
جب رات گئے کوئی کرن میرے برابر
چپ چاپ سی سو جائے تو لگتا ہے کہ تم ہو
جاں نثار اختر
تیرے معصوم سوالات سے ڈر لگتا ہے
زندگی تیری عنایات سے ڈر لگتا ہے
پہلے حالات بدلنے کی بڑی حسرت تھی
اب بدلتے ہوئے حالات سے ڈر لگتا ہے
جیسے ہوتے ہیں زمانے میں وسائل تقسیم
ایسے اسلوب ِ مساوات سے ڈر لگتا ہے
جب سے قائم ہے مشینوں کی حکومت دل پر
تب سے انسان کو جذبات سے ڈر لگتا ہے
غیر پھر غیر ہیں جیسا بھی رویہ برتیں
اب تو اپنوں کی مدارات سے ڈر لگتا ہے
میرے اندر ہے مرا کوئی مخالف شائد
مجھ کو اپنی ہی کسی بات سے ڈر لگتا ہے
خواب سے ، درد سے احساس سے تنہائی سے
عشق کی ساری خرافات سے ڈر لگتا ہے
یوں نہیں ہے کہ چراغوں میں کوئی بات نہیں
بات یوں ہے کہ انہیں رات سے ڈر لگتا ہے
ڈاکٹر احمد خلیل
میں خود سے محبت کا ارادہ نہیں کرتا
کیونکہ میں کوئی کام بھی آدھا نہیں کرتا
اک بار ہی کہتے ہیں یہ فطرت ہے ہماری
گر مانے نہ تو پھر میں اعادہ نہیں کرتا
ہم بارِ محبت بھی اُٹھاتے ہیں خودی سے
میں بوجھ کسی دوجے پہ لادا نہیں کرتا
پہچان سکو گے نہ کبھی پیار کو میرے
میں کام کبھی کوئی بھی سادہ نہیں کرتا
مجھ کو نہ کہے کوئی بہت بے وفا تھا وہ
اس واسطے تو یار میں وعدہ نہیں کرتا
پاکیزہ محبت ہے مرے دل میں اے جاناں
خواہش میں غلط کوئی مبادا نہیں کرتا
دیکھو نہ ہمیں چھیڑو ذرا دور رہو تم
مے سے کبھی انکار یہ بادہ نہیں کرتا
سید محتشم رضا
زندگی تو نے لہو لے کے دیا کچھ بھی نہیں
تیرے دامن میں مرے واسطے کیا کچھ بھی نہیں
آپ ان ہاتھوں کی چاہیں تو تلاشی لے لیں
میرے ہاتھوں میں لکیروں کے سوا کچھ بھی نہیں
یا خدا اب کے یہ کس رنگ میں آئی ہے بہار
زرد ہی زرد ہے پیڑوں پہ ہرا کچھ بھی نہیں
دل بھی اک ضد پہ اڑا ہے کسی بچے کی طرح
یا تو سب کچھ ہی اسے چاہئے یا کچھ بھی نہیں
راجیش ریڈی
روگ ایسے بھی غم یار سے لگ جاتے ہیں
در سے اٹھتے ہیں تو دیوار سے لگ جاتے ہیں
عشق آغاز میں ہلکی سی خلش رکھتا ہے
بعد میں سیکڑوں آزار سے لگ جاتے ہیں
پہلے پہلے ہوس اک آدھ دکاں کھولتی ہے
پھر تو بازار کے بازار سے لگ جاتے ہیں
بے بسی بھی کبھی قربت کا سبب بنتی ہے
رو نہ پائیں تو گلے یار سے لگ جاتے ہیں
کترنیں غم کی جو گلیوں میں اڑی پھرتی ہیں
گھر میں لے آؤ تو انبار سے لگ جاتے ہیں
داغ دامن کے ہوں دل کے ہوں کہ چہرے کے فرازؔ
کچھ نشاں عمر کی رفتار سے لگ جاتے ہیں
احمد فراز
مکیں سے کہنے لگا اک مکاں کا سناٹا
ہے تیرے دم سے سلامت یہاں کا سناٹا
بہار اپنی حقیقت سے آشنا ہی نہیں
شجر کے ساتھ کھڑا ہے خزاں کا سناٹا
ہجومِ رنگ میں اب یاد بھی نہیں آتا
کہ دل کو کھینچ رہا ہے کہاں کا سناٹا
عجیب حال ہے آنکھوں کا سیلِ اشک کے بعد
ہو جیسے دشت میں آبِ رواں کا سناٹا
تھمی جو شورشِ باراں تو یہ ہوا معلوم
زمیں پہ پھیل گیا آسماں کا سناٹا
نجانے کون سی جانب نکل گیے طایر
چہک رہا ہے بہت آشیاں کا سناٹا
وہ کون ہے جو مراسم کی رونقوں میں رضی
اتارتا ہے زباں پر بیاں کا سناٹا
- رضی حیدر
گھر بنانا چاہتا ہوں میرا گھر کوئی نہیں
دامنِ کہسار میں یا ساحلِ دریا کے پاس
اونچی اونچی چوٹیوں پر سرحدِ صحرا کے پاس
متفق آبادیوں میں، وُسعتِ تنہا کے پاس
روزِ روشن کے کنارے یا شبِ یلدا کے پاس
اس پریشانی میں میرا راہبر کوئی نہیں
خواہشیں ہی خواہشیں ہیں اور ہنر کوئی نہیں
گھر بنانا چاہتا ہوں میرا گھر کوئی نہیں
— منیر نیازی
خوشبو کے ساتھ اس کی رفاقت عجیب تھی
لمس ہوائے شام کی راحت عجیب تھی
لپٹا ہوا تھا ذہن سے اک کاسنی خیال
اترا تو جان و جسم کی رنگت عجیب تھی
ملنے کی آرزو، نہ بچھڑنے کا کچھ ملال
ہم کو اس آدمی سے محبت عجیب تھی
آنکھیں ستارہ ساز تھیں باتیں کرشمہ ساز
اس یار سادہ رو کی طبیعت عجیب تھی
نوشی گیلانی
.
میری ساری دعائیں تم سے ھی منسوب ھیں جاناں
محبت ھو اگر سچی دعائیں کب بدلتی ھیں
“ کوئی پا کر نبھاتا ھے, کوئی کھو کر نبھاتا ھے
نئے انداز ھوتے ھیں, وفائیں کب بدلتی ھیں ”
نوشی گیلانی
لاکھ ضبطِ خواہش کے
بے شمار دعوے ہوں
اس کو بھول جانے کے
بے پناہ ارادے ہوں
اس محبت کو ترک کر کے جینے کا
فیصلہ سنانے کو
کتنے لفظ سوچے ہوں
پر دل کو اس کی آہٹ پہ
برملا دھڑکنے سے
کون روک سکتا ہے؟
نوشی گیلانی
“Ye na thi humari kismat” by mirza ghalib and sung by Tina sani is such a treat. Currently in the library crying instead of studying.
I pity the people who don’t know urdu, and don’t understand Indian classical music.
مجھ کو شاید ہرا بھرا کر دے
تیری آواز معجزہ کر دے
جینے والوں کو تُو نہیں مطلوب
مرنے والوں کا فائدہ کر دے
اُس کی نظروں میں آ چکا ہوں میں
کیا پتا مجھ کو کیا سے کیا کر دے
راج چلتا ہے اُس کی آنکھوں کا
وہ جسے چاہے سر پھرا کر دے
عشق کا لطف ہی نہیں آتا
عشق جب تک نہ باولا کر دے
میں اگر تیرے کام کا ہی نہیں
پھر مجھے میرے کام کا کر دے
یار ! انکار تھوڑی کرتا ہوں
جو بھی غم دے ! مجھے بتا کر دے
یہ مری قید کا تقاضا ہے
ہر رہائی سے اب رہا کر دے
ابتدا ہے یہی تغافل کی
بس توجہ کی انتہا کر دے
زین کیوں ساتھ رکھ لیا ہے اُسے ؟
جو جدا ہو گیا ! جدا کر دے !
- زین شکیل
اس دیس میں لگتا ہے عدالت نہیں ہوتی
جس دیس میں انسان کی حفاظت نہیں ہوتی
مخلوق خدا جب کسی مشکل میں پھنسی ہو
سجدوں میں پڑے رہنا عبادت نہیں ہوتی
ہم خاک نشینوں سے ہی کیوں کرتے ہیں نفرت
کیا پردہ نشینوں میں غلاظت نہیں ہوتی
یہ بات نئی نسل کو سمجھانا پڑے گی
عریانی کبھی بھی ثقافت نہیں ہوتی
ہر شخص سر پر کفن باندھ کے نکلے
حق کے لیے لڑنا تو بغاوت نہیں ہوتی
حبیب جالب
فرنگی کا جو میں دربان ہوتا
تو جینا کس قدر آسان ہوتا
میرے بیٹے بھی امریکا میں پڑھتے
میں ہر گرمی میں انگلستان ہوتا
مری انگلش بلا کی چست ہوتی
بلا سے جو نہ اردو دان ہوتا
جھکا کے سر کو جو ہو جاتا سر میں
تو لیڈر بھی عظیم الشان ہوتا
زمینیں مری ہر صوبے میں ہوتیں
میں واللہ صدر پاکستان ہوتا
حبیب جالب
دشمنوں نے جو دشمنی کی ہے
دوستوں نے بھی کیا کمی کی ہے
خامشی پر ہیں لوگ زیر عتاب
اور ہم نے تو بات بھی کی ہے
مطمئن ہے ضمیر تو اپنا
بات ساری ضمیر ہی کی ہے
اپنی تو داستاں ہے بس اتنی
غم اٹھائے ہیں شاعری کی ہے
اب نظر میں نہیں ہے
ایک ہی پھول
فکر ہم کو کلی کلی کی ہے
پاسکیں گے نہ عمر بھر جس کو
جستجو آج بھی اسی کی ہے
جب مہ و مہر بجھ گئے جالبؔ
ہم نے اشکوں سےروشنی کی ہے
حبیب جالب
جی نہ چاہا اُسے بھلانے کو
اک گھروندا رہا ہے ڈھانے کو
اک ستارہ مژہ پہ روشن ہے
اک دیا رہ گیا بجھانے کو
ہاتھ کانٹوں سے کر لیے زخمی
پھول بالو ں میں اک سجانے کو
ریزہ ریزہ بکھر گیا انساں
گھر کی ویرانیاں جتانے کو
آنسوؤں کو ترس گئیں آنکھیں
لوگ ہنستے رہے دکھانے کو
سانس کی بات ہو کہ آس اداؔ
سب کھلونے تھے ٹوٹ جانے کو
ادا جعفری
ساقی شراب لا کہ طبیعت اداس ہے
مطرب رباب اٹھا کہ طبیعت اداس ہے
رک رک کے ساز چھیڑ کہ دل مطمئن نہیں
تھم تھم کے مے پلا کہ طبیعت اداس ہے
چبھتی ہے قلب و جاں میں ستاروں کی روشنی
اے چاند ڈوب جا کہ طبیعت اداس ہے
مجھ سے نظر نہ پھیر کہ برہم ہے زندگی
مجھ سے نظر ملا کہ طبیعت اداس ہے
شاید ترے لبوں کی چٹک سے ہو جی بحال
اے دوست مسکرا کہ طبیعت اداس ہے
ہے حسن کا فسوں بھی علاج فسردگی
رخ سے نقاب اٹھا کہ طبیعت اداس ہے
میں نے کبھی یہ ضد تو نہیں کی پر آج شب
اے مہ جبیں نہ جا کہ طبیعت اداس ہے
امشب گریز و رم کا نہیں ہے کوئی محل
آغوش میں در آ کہ طبیعت اداس ہے
کیفیت سکوت سے بڑھتا ہے اور غم
قصہ کوئی سنا کہ طبیعت اداس ہے
یوں ہی درست ہوگی طبیعت تری عدمؔ
کمبخت بھول جا کہ طبیعت اداس ہے
توبہ تو کر چکا ہوں مگر پھر بھی اے عدمؔ
تھوڑا سا زہر لا کہ طبیعت اداس ہے
عبد الحمید عدم
آ جا کہ ابھی ضبط کا موسم نہیں گزرا
آ جا کہ پہاڑوں پہ ابھی برف جمی ہے
خوشبو کے جزیروں سے ستاروں کی حدوں تک
اس شہر میں سب کچھ ہے بس اک تری کمی ہے
